ಹೆಮ್ಮೆಯ ಜನುಮ ಬೇಡೋಣ

ಹೆಮ್ಮೆಯ ಜನುಮ‌ ಬೇಡೋಣ

~~~~~~~~~~~~~~~~

ಭಾಮಿನೀ ಷಟ್ಪದಿಯಲ್ಲಿ

ಹರಿವ ನದಿಯಿದು ಪೊರೆದು ನಮ್ಮಯ

ಸಿರಿಯ ಹೆಚ್ಚಿಸಿ ನಲಿದು ಸಾಗುತ 

ಧರೆಯ ಸೊಬಗಿನ ಸಕಲ ಜೀವಿಯ ಸಾಕಿ ಸಲಹುತಿರು|

ಕೊರೆವ ಚಳಿಯಲಿ ತೀರ್ಥ ಕುಂಡಿಕೆ

ಮೊರೆದು ಬರುವುದ ನೋಡೆ ನಡುಗುತ

ಪುರದ ಮಂದಿಯು ಪೂಜೆ ಮಾಡಲು ಕಾದು ನಿಂದಿಹರು|| 

ಕೊಡಗು ನಾಡಿನ ಮೊದಲ ದೇವಿಯೆ 

ಕೊಡುಗೆ ನಿನ್ನದು ನಮ್ಮ ಹಿರಿಮೆಗೆ

ಬಡವ ಬಲ್ಲಿದರೆಂದು ನೋಡದೆ ನೀಡಿ ಕಾಯುತಿರೆ|

ಗುಡುಗಿ ಮಿಂಚುವ ಮೋಡದಿಂದಲಿ

ಬೆಡಗು ತರಿಸುವ ಮಳೆಯು ಸುರಿಯಲು

ನಡುಕ ತರಿಸಿದ ನಿನ್ನ ಹರಿವನು ಮತ್ತೆ ತಾರದಿರೆ|| 

ನಾಡ ಮಂದಿಗೆ ಸಕಲ ಸೌಖ್ಯವ

ನೀಡು ಮಾತೆಯೆ ಕರವ ಮುಗಿಯುತ

ಬೇಡಿಕೊಳ್ಳುವೆ ಕೊಡಗು ಮಿನುಗಲಿ ಹೆಮ್ಮೆಯೆನುವಂತೆ| 

ಗೂಡಿನೊಳಿಗಿನ ಹಕ್ಕಿಯಂದದಿ

ಬಾಡಿ ಹೋಗಿಹ ನಮ್ಮ ಜನರನು

ನೋಡಿ ನೋಡದ ಹಾಗೆ ಮಾಡದೆ ಸಲಹು ಹೊಳೆವಂತೆ|| 

ಅಮ್ಮೆ ಕಾವೇರಿಯನು ನಾವ್ಗಳು

ಸುಮ್ಮನಿರದೆಲೆ ಹಾಡಿ ಹೊಗಳುತ

ಬೊಮ್ಮ ನೀಡಿದ ನಾಡು ಬೆಳಗಲಿಯೆಂದು ಕೇಳೋಣ|

ನಮ್ಮ ಕೊಡಗಿನ ಹಿರಿಮೆ ಹರಡಲು

ಜಮ್ಮ ಭೂಮಿಯ ಮೇಲೆ ಮುಂದಿನ

ಹೆಮ್ಮೆಯೆನಿಸುವ ಜನ್ಮ ನೀಡಲು ಮನವಿ ಮಾಡೋಣ|| 

ಪಶಿವೈ 

ಪಿಎಸ್ ವೈಲೇಶ ಕೊಡಗು

೧೭/೧೦/೨೦೧೯