ಬಹುಹಿತ ಜೀವನ

ಬಹುಹಿತ ಜೀವನ
~~~~~~~~~~
ಬಾಳ ಹಾದಿಯಲಿ ಬುತ್ತಿಯು ಜೊತೆಗಿರಲಿ
ಅಪ್ಪ ಅಮ್ಮನಿತ್ತ ಬಲವೂ ನಮಗಿರಲಿ
ಆರು ಏನು ಎನುವ ತಿಳಿವದು ತಿಳಿದಿರಲಿ
ಗುರು ಹಿರಿಯರು ತಂದ ಅಕ್ಕರೆ ನಗುತಿರಲಿ ||ಪ||

ಮುದ್ದಿನ ಮಾತುಗಳ ಮಧುರಸ ನಮದಿರಲಿ
ಸುಳ್ಳು ಪೊಳ್ಳುಗಳ ಮಾಲೆಯು ಹೊರಗಿರಲಿ
ಮೋಸ ವಂಚನೆಗಳ ಸಂಚದು ನಡುಗಿರಲಿ
ಸ್ವಂತ ಬುದ್ಧಿಯೆಂಬ ಹಣತೆಯು ಬೆಳಗಿರಲಿ ||೧||

ಎದುರೆ ಇರಿಯುವಂತ ನುಡಿಯದು ಕಡೆಗಿರಲಿ
ಮಧುವ ಬೆರಸುವಂತ ನಡತೆಯು ನಡೆದಿರಲಿ
ಎಲ್ಲರೊಳು ಬೆರೆವ ಮನವು ಮನೆಮಾಡಿರಲಿ
ಬರಿದೇ ಉಸುರುವ ಚಾಳಿಯದು ದೂರಿರಲಿ||೨||

ಸಕಲಕು ಸರ್ವರನು ಶೋಷಿಪುದು ತರವಲ್ಲ
ಸ್ವಹಿತದ ಸಾಧನೆಗೆ ದೂಷಿಪುದು ಅಳವಲ್ಲ
ಬಹುಹಿತ ಜೀವನ ತ್ಯಾಗಮಯ ಆಗುವುದಲ್ಲ
ಬಹು ಜನರ ಮನದಲಿ ನಿಜದ ಅರಿವಾಗಿಲ್ಲ

ವೈಲೇಶ ಪಿ ಯೆಸ್ ಕೊಡಗು
ಚಾಲಕರು ಕರಾರಸಾಸಂಸ್ಥೆ ಮಡಿಕೇರಿ
೨/೧/೨೦೧೮